Musayev Şahbaz Şamı oğlu 1961-ci il aprelin 20-də Gürcüstanın Dmanisi rayonunun Qızılkilsə kəndində anadan olub. 1968-1978-ci illərdə Qızılkilsə kənd orta məktəbində oxuyub. 1978-1979-cu illərdə Dmanisi şəhərində Kommunal Xidmətləri Kombinatında fəhlə işləyib, 1979-cu ildə Azərbaycan Dövlət Pedaqoji İnstitutunun filologiya fakültəsinə daxil olub, 1983-cü ildə ali məktəbi fərqlənmə diplomu ilə bitirib. Ali məktəbi bitirəndən sonra pedaqoji fəaliyyət göstərib, Təhsil Nazirliyinin “Ana sözü” jurnalında korrektor, sonrakı illərdə müxtəlif mətbuat orqanlarında müxbir, redaktor, baş redaktor vəzifələrində işləyib.

1999-cu ildən Azərbaycan Milli Elmlər Akademiyasında işləyir. 2002-ci ildən Nizami Gəncəvi adına Ədəbiyyat İnstitutunun əməkdaşıdır. Hazırda İnstitutun Erkən realizm və Yeni dövr Azərbaycan ədəbiyyatı şöbəsinin baş elmi işçisidir. 2004-cü ildə fəlsəfə doktoru, 2021-ci ildə elmlər doktoru dissertasiyası müdafiə edib.

Pedaqoji fəaliyyətini Bakı Slavyan Universitetinin Jurnalistika kafedrasının professoru kimi davam etdirib. 9 monoqrafiyanın və yüzə yaxın elmi məqalənin müəllifidir. Elmi məqalələri Azərbaycandan başqa, Türkiyə, Ukrayna, Rusiya, Kanada, Meksika, Braziliya, Hindistan və b. ölkələrdə çap edilmişdir. Azərbaycan Yazıçılar Birliyinin, Azərbaycan Jurnalistlər Birliyinin üzvüdür.

Ailəlidir, bir oğlu və bir qızı var. Həyat yoldaşı evdar qadındır, oğlu Musayev Asif Bakı Dövlət Universitetinin tətbiqi kimya, qızı Musayeva Sevinc Azərbaycan Dövlət Pedaqoji Universitetinin filologiya fakültəsini bitirmişdir və hər ikisi öz ixtisasları üzrə işləyir.