Xəbərlər
22.10.2026 - 09:00
SƏNAN HƏSƏNOV ARB-NİN “GÜNDƏM” VERİLİŞİNDƏ BEYNƏLXALQ SİYASİ PROSESLƏRİ ŞƏRH EDİB
AMEA Azad Həmkarlar İttifaqının sədri, siyasi elmlər üzrə fəlsəfə doktoru, dosent Sənan Həsənov ARB kanalının “Gündəm” verilişinin qonağı olub.
Verilişdə Rusiya ilə ABŞ arasında münasibətlər, ABŞ Prezidenti Donald Tramp və Rusiya Prezidenti Vladimir Putinin siyasi mövqeləri, eləcə də Ukrayna münaqişəsinin həlli perspektivləri ətrafında müzakirələr aparılıb.
Sənan Həsənov beynəlxalq münasibətlərdə dövlətlərin milli maraqlarının roluna toxunaraq bildirib ki, dövlət başçıları arasında keçirilən görüşlərdə müşahidə olunan mehriban münasibətlər hər zaman konkret siyasi nəticələrin əldə olunması demək deyil. Belə görüşlərin əhəmiyyəti tərəflərin bəyanatları ilə yanaşı, əldə olunan razılaşmalar və onların praktiki nəticələri əsasında qiymətləndirilməlidir.
Müzakirə zamanı ABŞ və Rusiyanın öz milli maraqlarını qorumaq, beynəlxalq proseslərdə mövqelərini möhkəmləndirmək istiqamətində atdıqları addımlara diqqət yetirilib. Qeyd olunub ki, diplomatik təmaslar və siyasi bəyanatlar dövlətlərarası münasibətlərin mühüm tərkib hissəsi olsa da, onların real nəticələri xüsusi əhəmiyyət daşıyır.
Ukrayna münaqişəsinin həlli perspektivlərinə toxunan Sənan Həsənov danışıqların davam etdirilməsinin vacibliyini vurğulayıb. Bu prosesdə Ukraynanın milli maraqlarının, suverenliyinin və ərazi bütövlüyünün nəzərə alınmasının əhəmiyyəti diqqətə çatdırılıb. Bildirilib ki, münaqişənin həlli istiqamətində diplomatik səylərin nəticə verməsi üçün tərəflərin mövqeləri arasında uzlaşmanın əldə olunması mühüm şərtdir.
Verilişdə, həmçinin danışıqların müxtəlif formatlarda keçirilməsi imkanları müzakirə olunub. Vurğulanıb ki, görüşlərin formatından asılı olmayaraq, əsas məqsəd münaqişənin həlli, gərginliyin azaldılması və davamlı sülhə nail olunması olmalıdır.
Sonda beynəlxalq münasibətlərdə dialoqun və diplomatik mexanizmlərin əhəmiyyəti qeyd edilib, dövlətlər arasında əldə olunan razılaşmaların konkret nəticələrlə möhkəmləndirilməsinin vacibliyi diqqətə çatdırılıb.
1545120462.jpg)
